නව ව්‍යවස්ථාවේ යෝජනා ගැන අනාවරණයක්

ආණ්ඩුක්‍රම ව්‍යවස්ථා සම්පාදන මණ්ඩලයට ඉදිරිපත් කෙරුණු මූලික අයිතිවාසිකම් සම්බන්ධ කමිටුවේ නිර්දේශ යෝජිත ව්‍යවස්ථාවට ඇතුළත් කෙරුණ හොත් මූලික අයිතිවාසිකම් විෂයයෙහිලා කලාපයේ ඉදිරියෙන්ම සිටින ව්‍යවස්ථාවක් බවට එය පත්වනු ඇති බව ආචාර්්‍ය ජයම්පති වික්‍රමරත්න මහතා පවසනවා.

ඔහු බී බී සී ගුවන් විදුලිය සමග සංවාදයට එක්වෙමින් සදහන් කළේ සිවිල් සහ දේශපාලනික අයිතිවාසිකම් පිළිබඳ පරාසය පුළුල් කරමින් ජීවත් වීමට ඇති අයිතිය, බලහත්කාරයෙන් අතුරුදහන් කරවීමෙන් මිදී සිටීමේ නිදහස, පුද්ගලික ආරක්ෂාව සහතික කිරීම ආදී කරුණු නව නිර්දේශවලට ඇතුළත් බවයි.

“ඊට අමතරව අපි යෝජනා කරලා තිබෙනවා සමාජ, ආර්ථික සංස්කෘතික අයිතිවාසිකම්, ළමා, කාන්තාවන් සහ දුබලතා ඇති පුද්ගලයන් සම්බන්ධ අයිතිවාසිකම්. ඒ වගේම පරිසරය සම්බන්ධ අයිතිවාසිකම් යෝජනා කොට තිබෙනවා,”

දුබලතා සහ විශේෂ අවශ්‍යතාවන් සහිත පුරවැසියන් සඳහා වූ සන්නිවේදනය සඳහා වූ අයිතිවාසිකම්, ගෞරවනීය ජීවිතයක් සහතික කෙරෙන අයිතිවාසිකම් සම්බන්ධ කරුණු අදාළ නිර්දේශ තුළ දීර්ඝ වශයෙන් සඳහන් කොට ඇති බව යි වික්‍රමරත්න මහතා අනාවරණ කළේ.

ශ්‍රී ලංකාවේ ජ්‍යෙෂ්ඨ පුරවැසියන්ටද සමාජයේ අනෙක් සියලු ජනකොටස්වලට හිමි අයිතිවාසිකම් ඒ හා සමාන ලෙසින් භුක්ති විඳීමට අවස්ථාව හිමි විය යුතුය යන්න කමිටුවේ තවත් නිර්දේශයක්.

විවිධ ජන කොටස් වෙසෙන රටක් වශයෙන් ඔවුන්ගේ ආගමික සහ භාෂා ඇතුළු සියලු අනන්‍යතාවයන් ආරක්ෂා කිරීම අරමුණු කරගනිමින් සිය කමිටුවේ නිර්දේශ ඉදිරිපත් කර ඇති බව කියා සිටි ආචාර්ය ජයම්පති වික්‍රමරත්න,”සෑම පුද්ගලයකුටම තනිව හෝ අන් අය සමග එක්ව තම සංස්කෘතිය භුක්ති විඳීම හෝ ප්‍රවර්ධනය කිරීම සහ කැමති භාෂාවක් කතා කිරීමට ඇති අයිතිය පිළිගැනීම යෝජනා මෙහිදී යෝජනා කර ඇති බවද අනාවරණ කළා.

 

ඔබගේ අදහස අපට කියන්න

Close